متقطمش وخلاص.. خليك حريف واعرف من أين يؤكل الكتف

قالوا في الأمثال "دا بيعرف من أين يؤكل الكتف"، بس انت عارف ان الموضوع دا وراه قصة وحكاية، يعني الموضوع مش كلام والسلام، دا أكل الكتف طلع له أصول، يعني متقطمش وخلاص، ولو متعرفش خليك معانا، علشان تعرف التركة فين.
المثل دا بيتقال على الناس الأذكياء، اللي بيعرفوا يوصلوا لغايتهم بفطنة ومعلمة، واتضح انه اتقال كدا علشان الناس في البدو والريف بياكلوا كتف الغنم والماعز بحرفنة، بيعرفوا يمسكوا منين ويقطموا منين علشان المرقة متوقعش واللحمة تفضل طرية.
القصة دي شغلت بال الكاتب السوري فلاح جاسم، وكتب: "لم أكن أعلم من أين يؤكل الكتف في السابق، على الرغم من أن الأهل في الأيام السابقة كانوا يذبحون الغنم والحملان، وهذه عادة الناس في الريف والبدو بشكل خاص، ولم يخطر على بالي وقت ذاك هذا الأمر ولم أسأل نفسي، هل جميع من يجلسون إلى المائدة يعرفون من أين تؤكل الكتف! لم آبه بذلك على الرغم من سماع تلك المقولة.

طريقة أكل الكتف

لو كنت من محبي تناول الكتف، فلازم تعرف ازاي تاكله باحترافية، يعني علشان تكون أكيل لازم تاكل الكتف من تحت لفوق، وبلاش تبدأ من فوق علشان دي بتبقى غلطة لا تغتفر، ودا له سبب مهم؛ وهو أن المرق بيكون بين لحم الكتف وعظمه، فلو كلت من فوق هيقع المرق واللحمة هتنشف معاك، أما بقى لو بدأت تمزمز من تحت لفوق، هتتقشر اللحمة عن العظم والمرقة هتفضل مكانها فوق العضم، وبكدا يبقى بالهنا والشفا، وهذا هو سر المثل القائل بأن هناك يعرف من أين يؤكل الكتف.
خلصت قصة انهاردة، لكن الحكاوي لسه مخلصتش، خليكم معانا وحلقة جديدة من فوود توداي.